LL’ECCRISSE

‘Na macchiulella nera annanz”o sole

e a ppoco a ppoco ‘o cielo se fa scuro;

‘na vecchia astregne forte a ‘na figliola,

‘o nniro scenne lento e ffa paura.

Crastole ‘e vrito pe’ ccient’uocchie apierte,

comme chi ‘a sciorta nera ‘a piglia ‘e faccia;

chi s’addenocchia e chi rimmane allerta…

So’ scene ‘e ‘nu ricordo ca s’affaccia.

E ssongo accussì vvive, accussì ccare,

ca mo me scappa quacche resatela;

‘nu sole ca scumpare e po’ accumpare,

è lluce ca risplenne assaje cchiù bella.

Ma ‘a vera eccrisse è ‘sta malincunia,

pe’ tutt”e ccose ca so’ scumparute;

pe’ chesti strate senza cchiù armunia,

pe’ ‘na semplicità ca se n’è gghiuta.

E nun ce stanno cchiù crastule ‘e vrito,

quanno n’eccrisse offusca anema e core;

si pure ‘o sole splenne...È senza vita…

È ppalla ‘e fuoco ca se stuta e more.

Antonio Ruggiero

Da: - Cchiù a Sud d”o Sud -

Editrice - Il Girasole - Aprile 2001

L’ecclisse

Una macchiolina nera innanzi al sole/ e un po’ per volta il cielo si fa scuro;/ una vecchia stringe forte una ragazza,/ il nero scende lento e fa paura.// Pezzi di vetro per cent’occhi aperti,/ come chi la sorte nera la prende di faccia;/ chi s’inginocchia e chi rimane dritto…/Sono scene di un ricordo che si affaccia.// E sono così vive, così care,/ che ora mi scappa qualche risatina;/ un solo che scompare e poi riappare,/ è luce che risplende ancor più bella./ Ma la vera eclisse è questa malinconia,/ per tutte le cose che sono sparite;/ per queste strade senza più armonia,/ per una semplicità che se n’è andata.// E non ci sono più pezzi di vetro,/ quando un’ecclisse offusca anima e cuore;/ seppure il sole splende...E’ senza vita…/ E’ palla di fuoco che si spegne e muore.