Chiove e fa friddo. Dint’a ‘nu stanzino,

stongo azzeccanne ll’ùrdeme pasture:

‘o zampugnaro, ‘a zingara, Benino…

e, attuorno a me, se ncantano ‘e ccriature.

- Guagliù, pigliate ‘e chiuove cu ‘o martiello,

quanno nchiovo ‘e mellune int’a pagliata.

E mo ncullammo ‘a coda ‘a ‘o ciucciariello

e ‘o verularo nnanze a’ castagnara…-

Muglierema s’accosta e dice: - Siente,

vide ‘stu cunto si sta fatto buono:

n’avimmo ‘a dà tremila a don Clemente,

settemila e trecento a donn’Antuono… -

Ma, cu ‘na mossa ammartenata e nzista,

lle nzerro ‘o libbro e dico: - Tiene mmano!

Invece ‘e me fa tanto ‘a cabalista,

pienze, cchiuttosto, a mettere ‘o tiano!

Ogge è Natale, io so’ ‘nu sciampagnone

e doppo ‘e feste se ne parlarrà…

Ogge penzammo a ‘e struffole e a ‘o capone,

‘e diebbete facimmole aspettà.

Giovanni Boccacciari

Dal Volume: « ‘O primmo ammore »

Edizioni Bellox - Napoli - 1966 -

Traduzione a cura di Rino Vittozzi

Natale generoso

Piove e fa freddo.In uno stanzino/ sto incollando gli ultimi pastori:/lo zampognaro, la zingara, Benino…/ e, intorno a me, si incantano i bambini.// - Bimbi, prendete i chiodi col martello,/ quando inchiodo i meloni nell’impagliata./E adesso incolliamo la coda all’asinello/ e il padellone davanti alla castagnata// Mia moglie si accosta e dice:- Senti,/ vedi questo conto se è fatto bene/ diamo tremila lire a don Clemente,/ settemila e trecento a don Antuono…// Ma, con una mossa spavalda e insistente,/ gli chiudo il libro e dico: - Aspetta!/ Invece di fare tanto la cabalista,/ pensa piuttosto a cucinare!// Oggi è Natale, io sono un generoso/ dopo le feste se ne parlerà…/ Oggi pensiamo agli struffoli e al cappone/ i debiti facciamoli aspettare.